வீல் சேரில் உட்கார்ந்தபடி வானத்து நிலவையும் நட்சத்திரங்களையும் ரசித்துக் கொண்டிருந்தார் புரபஸர் ஜான்.ஏரியா 51 ல் வேலை செய்து மூன்று நாட்களுக்கு முன்பு ரிட்டயர்டு ஆனவர்.பிரியா விடை கொடுத்த ஏரியா 51ன் நிர்வாகம் பரிசாக கொடுத்த பெட்டியை மடியில் வைத்திருந்தார்.மனைவியை இழந்தவர்.ஒரே துணையான டிடோவுடன் ஒதுக்குப்புற பண்ணை வீட்டில் வசிக்கிறார்.டிடோ அவரது வேலைக்காரன்.கேரட் பீன்ஸ் என்று பச்சை காய்கறிகளை தின்னும் விநோதன்.நள்ளிரவில் யூரின் போக வேண்டும் என்று நினைத்தாலே உடனே கதவை திறந்து உள்ளே வந்து உதவுபவன்.டெலிபதி எதாவது தெரியுமோ என்று டிடோவின் மீது ஜானுக்கு மெல்லிய சந்தேகமும் உண்டு.அவரின் தேவைகளை சொல்லாமலே நிறைவேற்றும் தேவதூதன்.
மகன் திருமணமாகி மனைவியுடன் வெளிநாடு போனபின்பேரஸிஸால் பாதிக்கப்பட்ட ஜானுக்கு டிடோ முழுநேர துணையாகிப் போனான்.ஜானுக்கு காபி குடிக்க வேண்டும் என்று தோன்றியது.
“மாஸ்டர்! இந்தாருங்கள் காபி! “என்று காபியோடு வந்த டிடோவை பார்த்து அதிசயித்தார்.மனதில் நினைப்பதை செய்யும் மாந்திரீகனோ?
“மடியில் என்ன மாஸ்டர் பெட்டி? “
“என் வேலைக்கான நினைவுப்பரிசு! “என்றவர் காபியை வாங்கிக் கொண்டார்.
“ஏரியா 51 ல் அப்படி என்ன மாதிரி வேலை செஞ்சீங்க மாஸ்டர்.?பொழுது போகலை.அரசியல், சினிமா விசயமெல்லாம் எனக்குத் தெரியாது.உங்க வேலையைப்பத்தி
.கொஞ்சம் சொல்லுங்களேன்! “
“அதெல்லாம் அரசு ரகசியங்கள்.உனக்காக சொல்கிறேன்.வெளியே சொல்லக்கூடாது. சரியா? “
“ஒகே மாஸ்டர்! நான் யாரிடம் சொல்ல போகிறேன்.உங்களை நம்பி வாழும் அனாதை நான்.!”
“இந்த கதை 1947ல் ராஸ்வெல் கிராமத்தில் விழுந்த பறக்கும் தட்டிலிருந்து துவங்குகிறது.அதில் பயணம் செய்த ஏலியன்கள் மூவரில் இரண்டு பேர் அப்போதே இறந்து போனார்கள்.ஒருவன் குற்றுயிராக இருந்தான்.ஆஸ்பிட்டலில் அனுமதிக்கப்பட்ட அவன் குணப்படுத்த முடியாமல் ஏரியா 51 க்கு கொண்டு செல்லப்பட்டான்.என்னைப் போன்ற விஞ்ஞானிகள் அவன் சாகும் போது உடன் இருந்தோம்.அப்போது எனக்கு இளம் வயது.அவன் சாகும் போது வெறுப்பும் துன்பமும் எங்களின் மனதை நிறைத்தது.ஏனென்று தெரியாமல் துக்கத்தால் பாதிக்கப்பட்டோம்.வானிலை பலூன் விபத்து என்று அரசு விஷயத்தை மூடி மறைத்தது.அந்த கலம் ஏரியாவிற்குள் கொண்டு வரப்பட்டது.”
“ஆஸ்பிட்டலில் சிகிச்சை தந்தவர்கள் விசயத்தை வெளி உலகிற்கு சொல்லியிருப்பார்களே? “
“அரசால் அவர்கள் காணாமலடிக்கப்பட்டார்கள்.பூமியில் இல்லாத உலோகத்தால் வடிவமைக்கப்பட்ட கலம் அது.மெல்லிய வளையக்கூடிய வலுவான உலோகம் அது.நவீன டெக்னாலாஜிகளை அதிலிருந்து கண்டு பிடிக்க பிளாக் பிராஜக்ட் என்ற ஆய்வுக் குழுக்கள் உருவானது.அவர்கள் அதிலிருந்து லேசர், கண்விழி அடையாளம், பைபர் ஆப்டிகல்னு நிறைய விசயத்தை கண்டு பிடித்தார்கள்.”
“அப்ப இதெல்லாம் நாம கண்டுபிடிக்கலையா? “
“ம்ஹிம்! அந்த கலத்தை ஆராய்ந்த போது அங்கே உணவுப் பொருட்களேஸ்டாக் இல்லை.அதாவது சூரிய சக்தியையே உணவாக மாத்தியிருக்காங்க! அதை விட பயங்கர விஷயம் கலத்தை செலுத்த ஸ்டியரிங்கோ ஜாய் ஸ்டிக் மாதிரியோ எதுவுமே இல்லை.தலையிலிருந்த ஹேட் போன் மாதிரியான ஒரு பொருளால் மன வேகத்தில் கலத்தை செலுத்தியிருக்கிறார்கள்.அதை காப்பியடிச்சு ஜேம்ஸ் கேமரூன் அவதார் படத்தில் பறவைகளோடு தங்களை மனரீதியாக இணைப்பதாக காட்டியிருப்பார்.”
“எல்லாம் சரி! மாஸ்டர்! நாம விண்வெளிக்கு போன தனியாக உடை அணிவது போல் ஏன் அவர்கள் அணியவில்லை! “
“அதீதமான அழுத்தத்தை அவர்களால் தாங்க முடியும்படியாக உடல் அமைப்பு இருப்பதாக பிரேத பரிசோதனை செய்த டாக்டர்கள் சொன்னார்கள்.அந்த ஹேட் போனை நாங்கள் பயன்படுத்த முயற்சித்த போது அது தலைக்கு பொருந்தலை.மேலும் கடுமையான தலைவலி வேறு வந்தது.அந்த கலத்தின் என்ஜின் மனித மன உணர்வுகளுக்கு ஏற்ப கலர் மாறுது.பச்சோந்தி மாதிரி.மகிழ்ச்சியாக இருந்தால் மஞ்சள்.கோபமாக இருந்தால் சிவப்பு.அது எப்படி வேலை செய்யுதுன்னு இன்னும் விளங்கலை! “
“உங்க மடியில் இருப்பது அந்த ஹேட் போனில் ஒன்றுதானே? “
“அது எப்படி உனக்கு தெரியும்? “
“ஒரு யூகம்தான்.அதை கொடுங்களேன் பார்க்கலாம்! “
ஜானிடமிருந்து வாங்கிய ஹேட் போன் போன்ற அமைப்பை வாங்கிய டிடோ அதை தலையில் மாட்டினான்.உடனே அதிலிருந்து பல வெளிச்சங்கள் கிளம்பின.
“அது உன் தலையில வேலை செய்யுது! “என்று பரபரப்பானார் ஜான்.
“ஆமாம் மாஸ்டர்! வேலை செய்யுது.ஏனென்றால் இது கிரிப்டான் கிரகவாசிகளுடையது.!”
அடுத்த விநாடி டிடோவின் தோல் கழட்டி போட்ட சட்டையாக கழன்று விழ விநோத உருவத்தில் நின்றது அது.ஜான் சில படங்களில் அந்த மாதிரியான உருவங்களை ஏலியன் என்ற பெயரில் பார்த்திருக்கிறார்.
“அந்த கலத்தில் வந்தது மூவரல்ல மாஸ்டர்.நால்வர்.அதில் தூக்கி வீசப்பட்ட நான்காவது ஆள் நான்.இந்த ஹேட் போன் இல்லாததால் என் சக்தியையும் தகவல் தொடர்பையும் இழந்தேன்.ஏரியா 51 ல் நுழைய முடியாமல் அதில் வேலை செய்யும் உங்கள் வீட்டில் வேலைக்காரனாக உருவம் மாறி நுழைந்தேன்.அதுதான் இந்த டிடோ.!உங்கள் உருவில் மாறிஏரியாவிற்குள் நுழைந்து இதை கைப்பற்ற நினைத்தேன்.ஆனால் நீங்கள் இங்கே வரவேயில்லை.வந்த போதெல்லாம் அருகே ஆட்கள் இருந்ததால் என்னால் உங்களின் உடலில் புக முடியவில்லை.உங்களின் நினைவு பரிசு இதுதான் என்று ஈ மெயில் மூலம் தெரிந்து காத்திருந்தேன்.நேற்று இரவேஹேட் போனை பயன்படுத்தி கிரிப்டானுக்கு நான் இருக்கும் இடத்தை பற்றி தகவல் அனுப்பி விட்டேன்.என்னை மீட்டுப் போக வந்து கொண்டிருப்பார்கள்.!”
“எங்களை விட நீங்கள் அறிவில் முன்னேறியவர்களா இல்லையா என்று மட்டும் சொல்லேன்.?”
“தப்பான அறிவியல் விதிகளை நம்புகிறீர்கள் மாஸ்டர்.காலம் காலமாக சொல்லப்படுவதை கேள்வி கேட்காமல் நம்புகிறீர்கள்! “
“புரியவில்லையே? “
“செலவிடப்படும் ஆற்றலும் சக்தியும் தீர்ந்து போக வேண்டும்.இல்லை வடிவம் மாற வேண்டும்.இந்த விதிக்கு புறம்பாக சூரியன் எரிந்து கொண்டேயிருக்கிறது.தீராத அந்த எரி பொருள் எங்கிருந்து வருகிறது மாஸ்டர்? எல்லா விசைக்கும் எதிர் விசை உண்டென்றால் கிரகங்களிடையிலான ஈர்ப்பு விசைக்கு எதிர்விசை எங்கிருந்து வருகிறது?”
“குழப்பமாக இருக்கிறது உன் கேள்விகள்! “
வானத்திலிருந்து மிதந்த ஒரு வினோத கலத்தின் நீண்ட ஒரு வெளிச்சப்புள்ளி அவன் மீது விழ மெல்ல எழுந்துஅந்தரத்தில் மிதந்தவன் “இதுவரை ஆதரித்ததற்கு நன்றி மாஸ்டர்.இனி உங்களை பார்த்துக் கொள்ள இந்த டிடோ இருக்க மாட்டான்.உங்களை நீங்களே கவனித்துக் கொள்ளுங்கள்.உங்களின் முடமான கால்களை சரியாக்கி விட்டேன்! “
அவன் வானத்தில் சிறு புள்ளியாய் மறைந்து காணாமல் போனான்.புரபஸர் எழுந்து நின்ற போது கைத்தடி கீழே விழுந்து உருண்டது.”டிடோ! “என்ற போது ஒரு துளி கண்ணீர் கன்னத்தில் உருண்டது.
கருத்துகள் இல்லை:
கருத்துரையிடுக